曲屏雖然唔係三星專利，但行內做得至有聲有色嘅必定係佢。眼見曲屏技術日漸成熟，三星馬上蠢蠢欲動試新嘢，傳聞下年一月會有部摺機。注意，唔係以前嗰種T9鍵盤摺機，而係成個芒能夠對摺！

事 實上，三星喺2014年已經漏口風，話自己研發緊可摺疊屏幕嘅手機。本來期望今年年底推出，大概中途遇到太多難題，結果推遲到下年。據稱呢部手機為內部項 目Project Valley產物，現已進入測試階段，分為中階同高階兩個版本，各自採用Snapdragon 620及820、3GB RAM，並配備microSD卡插槽。

 

相信大家都想知道點解個芒摺得到，或者我哋可以從三星申報過嘅專利 設計分析吓。根據Patently Mobile提供嘅設計圖，三星喺OLED屏幕兩旁正中央裝置一塊特別元件，內裡有兩個小齒輪，令上、下兩截可調節至不同角度，並且固定；中間亦會有鉸鏈 連接。而由於金屬、塑膠等材質欠缺彈性，機背會以布料製成。既然摺得埋，個芒大啲都唔會袋唔落褲袋，三星呢次又幾好橋喎。